مقدمة
دلوقتي انا عاوز اشرح شوية حاجات بذاكرها، او عاوز اكتب افكار ليا هنا في البلوج عشان تكون متأرشفه وأقدر ارجع ليها بعد كده بسهولة بدل ما أنا بنشر على الفيسبوك وعلى تويتر.. ألخ. بس المشكلة اني انا فالجيش، ومعييش طبعا كمبيوتر، لكن بطريقة ما معايا التليفون، أحيانا في نص اليوم او في بداية اليوم لما بستلم نبطشية ليل بيكون في وقت فراغ ساعتين ولا تلت ساعات.. ونبطشية صبح بيكون في وقت كويس برده فارغ ممكن أستغله أني اقرأ كتاب او أذاكر، بقرأ كتاب فـ بلقط فكره والفكرة دي بكون عاوز أكتب عنها مقال، لكن حقيقي مفيش حاجة بتشجع.. لكن عملت البلوج دي عشان تكون فايدتها عالمدى البعيد.. مش عارف ممكن تكون ايه الفايدة لكن ممكن يكون في فايدة عالمدى البعيد. المهم، قولت لنفسي انا عاوز ابدأ تاني في التدوين أثناء الخدمة العسكرية، وعاوز ابدأ اشرح مواد معينة بستمتع لما بذاكرها بالذات شرح مواد مهمة زي الـ Computer Architecture & Logic Design.. فكنت بدور على أدوات ممكن تساعدني على الموبايل بحيث أقدر أcompile ال hugo project اللي عندي.. دورت كتير لحد ما لقيت حل راضي عنه.
الأبلكيشنز الأساسية
اول حاجة انا كنت محتاجها هو الـGit.. بعد كده سألت نفسي ازاي اقدر اخلي الGit يشتغل على التليفون.. لقيت app اسمه Termux.. الأبلكيشن ده لعبت فيه شوية لحد ما قدرت أcompile عليه debian image .. ونزلت عليه desktop environment اسمه xfce وقدرت من خلال الvnc اني أتحكم في الsystem اللي موجود على الـlocalhost اللي هو الموبايل واظهر طبعا الصورة بتاعت الـDesktop Environment اللي هو xfce.. المهم، ده موضوع تاني تماما يطول شرحه.. خلاص أحنا لقينا حل لمشكلة الGit فلقيت الـ Termux وبالتالي لقيت اني اقدر انزل عليه hugo من الpackage manager الخاص بالـ Termux .. تمام زي الفل. دلوقتي انا عملت push للبروجكت اللي موجود عالكمبيوتر..محتاج حاليا اعمل clone من على الموبايل بتاعي .. طيب، طبعا أول حاجة هتعملها هتنزل git
pkg update pkg upgradepkg install git
زي الفل، نظبط بقى الconfigurations بتاعتنا
git config --global user.name "<your username>"
git config --global user.email "<your email>"
تمام، دلوقتي عاوزين نعمل clone للـ بروجكت بتاعنا.. بس أول حاجة احنا عاوزين Termux يقدر يوصل للملفات بتاعتنا اللي على التليفون.. هنعمل ده من خلال الـcommand ده:-
bashtermux-setup-storage
دلوقتي خلينا نـnavigate للـlocation ده:
cd storage/shared/documents
هنعمل دلوقتي clone للـ repo بتاعتنا
git clone https://github.com/blackaly/mobile-blogging.git
Hugo
حان الوقت الأن اننا نـcompile البروجكت بتاعنا.. اول حاجة طبعا لازم ننزل hugo، بكومند بسيط:-
pkg install hugo… تمام المفروض دلوقتي أنه نزل عالجهاز عندك.. اول حاجه متنساش طبعا انك تـnavigate للـroot folder بتاع البروجكت بتاعك الاول، وبعدين هترن الـcommand ده:-
hugo server -D --noBuildLock المفروض يظهر لك دلوقتي الـouput ده.. 
والبروجكت بتاعنا شغال عــــادي..
بالمناسبه انا شغال على code editor اسمه Acode هو في مشاكل بس يعني مناسب للموبايل وكويس.. بس عشان موضوع اللغة العربية فيه، فبستخدم app اسمه SiYuan وده كويس اوووي لو بتكتب بالـMarkDown.
بس، والمقال ده طبعا كاتبه وانا بستخدم الموبايل : )
good bye.